الشجاعة للسماح بالتعلم 🐜

بتتوقعوا أنو بمجرد اني “انوي” اتعلم كل قواعد الاحصاء بالرياضيات ، بكون تلاقئياً اتعلمتها ومستعدة حل اي مسألة او تمرين مباشرة وبدون أخطاء وبدون ساعات من التعلم؟؟

طيب كيف منتوقع من اي شخص بأي مرحلة عمرية انو يتعلم مهارات الحياة بمجرد انه عنده “نية يكون انسان جيد”!

كيف بتوقع من بنتي يلي عمرها سنتين انو تعرف قوانين الفيزياء بشكل فطري؟ وانو إذا رمت شي على الأرض بقوة ممكن ينكسر؟

وكيف بتوقع من مراهق بعمر ١٦ سنة ، لما يسمع شخص عم يوجهله صفة مهينة متل كلمة “انتوا جيل تافه” او انت “ولد غبي مافي منك فائدة”.. كيف بتوقع من المراهق يتفهم انه هاد الكلام ما بيعني ولا شي غير انه الشخص يلي حكاه مثير للشفقة، وانو ثقته بنفسه وبمستقبله مو لازم تتهدم بعد هالعبارات؟

وكمان كيف بتوقع من نفسي اني مر بكل تجاب الحياة الصعبة وكون بعرف اتعامل معها بذكاء وحكمة مباشرة وبشكل فطري!!

لا هادي المعلومات كلها بتحتاج سنيييين لنكتسبها! وبتحتاج انو نغامر ونغلط ونوقع! ومانعتبرها كارثة! ونعتبر الغنيمة الأكبر هي الخبرة يلي عم نتعلمها بكل فشل صغير .

كتير بتمر علينا مواقف لما منشوف شخص وهو عم ياخد قرار خاطئ وممكن يأثر على حياته بشكل سلبي ويسببله خسارة متل الرسوب بمادة مدرسية او مشكلة صحية او مشكلة اسرية.. الخ ، وبكل مرة منراهن على خسارة هاد الشخص ومنتفاخر بأنه نجحنا بتنبؤ فشله!!

نادراً ما اسمع حالي او شخص تاني عم يقول “هادي الورطة رح تعلمه درس مهم جداً وأنا سعيد لفلان انه عم يمر بفترة صعبة لأنه حياته بعدها رح تتغير بشكل حلو!”

سلمى علمتني بآخر شهرين انه ما ابقى عم اركض وراها كل ما شفتها عم تتسلق الصوفا وابقى ماسكة ايدها طول الوقت حتى ما توقع!

اتعلمت اني راقبها هي وعم تتسلق (طالما بعرف انو الوقعة من هيك مكان بتوجع شوي بس مو خطيرة عليها)

واتخيل لو كانت ايديي مكبلة حرفياً حتى امنع حالي من اني امسكها طول الوقت واحرمها من التعلم..

بالانكليزي في عبارة (I sit on my hands) يعني (أجلس على يَدَي) كتير معبّرة هادي الجملة!!

لازم نقعد على ايدينا وقت منشوف شخص عم يمر بمرحلة التعلم! نعطيه كل وقته انه يتعلم ويجرب ويفشل ويعيد المحاولة ويفشل مرات بعدها ويتعلم من كل فشل وبعدها يكسب كل هادي الدروس يلي كان ممكن نروحها عليه لو اتدخلنا!

تذكير صغير لنفسي وللأصدقاء يلي عم يقرأوا:

في مهارات حياتية نادراً مانكتسبها بشكل فطري، هادي المهارات بتحتاج لدراسة وممارسة وتجربة… مابيخطرلنا بكل مرة منلوم حالنا فيها على فشلنا بجانب من جوانب الحياة، انه نحنا ببساطة ماعطينا أنفسنا الفرصة نعترف بضعفنا بهادي المهارات ونبحث عن الطرق يلي ممكن نتعلم ونتدرب عليها!

متل الحب! والشجاعة! واللطف! والصراحة، والمبادرة، والكرم، والتعاطف، والحكمة، والتوقع!.. الخ

مو شرط من لما ننولد نكون شاطرين بهادي الجوانب! لهيك طبيعي نسأل عنها ونقرأ عنها ونتعلمها ونتدرب عليها لسنين ونكتسبها بالنهاية!

16 رأي حول “الشجاعة للسماح بالتعلم 🐜

اضافة لك

  1. أنا يعيد لفلان أنو عم يمر بورطة لانو حياتو بعدها رح تكون حلوة !! يالله شو نفسي اسمع هالجملة لما تواجهني مشكلة بدل مااسمع “قلتلك رح يصير فيكي هيك ومارديتي خرجك بتستاهلي” 🤦🏻‍♀️

    تسلم ايديكي غبتي وجيتي بشي حلو 💙🤞🏼

    Liked by 1 person

  2. كلام معبر وجميل جدا فعلا دايم ازعل من نفسي لاني مو عارفه اتعامل مع مشاعري او اختار لبسي وماما كانت تقول لي عادي دانه! اغلطي مره مرتين ثلاث وتتعلمين بس ارفض واقول مابي اغلط لان مابي اندم فغالبا ما اقرر للاسف واحرم نفسي متعه التعلم والخطأ

    Liked by 1 person

  3. هل تعلمين ما هو الشيئ الأجمل لدي والذي وصلتي من خلال هذه التدوينه انك انسانه قد وصلت إلى مرحله التصالح مع الذات التي يحلم بها كثر ويفتقدها كثر.. فعندما نصل لهذه القدره على التعبير وفهم مايدور حولنا، نرى الوقائع والحقائق بعين أخرى هي تماما ما أشرت ووصفت به بكلماتك الجميله الهادفه.. كل الحب ♥

    Liked by 1 person

  4. بالضبط انا بنتي برضو عنرها سنتين ونص الان ف فكثير من الاحيان براقبها وبحذرها انه ممكن توقع من شي شغلة تخاول تتسلقها وتجلس عليها وانا عارفة انه مابتتعور بقوة. بس عشان تتعلم لحالها انه تتنتبه وتعرف انه خطا لحالها

    Liked by 1 person

    1. كتير صعب على الأهل انهم يعيشو احساس الخوف مقابل انه الطفل يتعلم 💔 شجاعة كبيرة منك انك بتقدري تسمحيلها تعيش هالتجارب تحت رعايتك وحبك ❤️❤️

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

المدونة لدى وردبرس.كوم. قالب: Baskerville 2 بواسطة Anders Noren.

أعلى ↑

%d مدونون معجبون بهذه: